३१ जानेवारी, २०१७

धनु राशीतील शनीचे साधारण गोचर परिणाम

 लोकहो,
नुकताच शनी धनु राशीत प्रवेश करता झालेला आहे. हे भ्रमण गोचर भ्रमण असून  प्रत्येक राशीवर त्याचे होणारे परिणाम पाहूयात.

मेषः
मेषेच्या भाग्यात शनी आला आहे. शनीची तृतीय दृष्टी लाभात असल्याने स्थावर मालमत्तेविषयक काही फायदे होतील. लेखन, करार मदार यात फायदे होतील.

वृषभः
अष्टमात आलेला शनी कामे लवकर होऊ देणार नाही. पैसा खेळता राहणार नाही. कोठेतरी अडकून राहील. विलंब होईल परंतु शनी पूर्ण नकारही देणार नाही.

मिथुनः
राशीच्या सप्तमात आलेला शनी प्रतिपक्षाकडून प्रत्येक बाब काळजीपूर्वक तपासूनच  पाठिंब्याचा प्रत्यय देईल. प्रतिपक्षात पत्नी, सहकारी यांचा समावेश होतो.

कर्कः
कर्केच्या षष्ठात आलेला शनी अनुभवी व्यक्तींकडून नव्या कामाचा प्रस्ताव घेऊन येऊ शकतो. त्रासदायाक वाटले तरी या कामाला नकार देऊ नये. नवे शिकण्याची संधी याच काळात मिळू शकते.

सिंह ः
पंचमातील शनी संतती व शिक्षणाबाबत काही प्रश्न उपस्थित करेल. तो केवळ प्रश्न उपस्थित करून थांबणार नाही तर लाभही देईल. चिकाटी ठेवा.

कन्याः घरासंबंधी प्रश्न असतील तर चतुर्थात येत असलेला शनी ते किंचित रेंगाळवेल. जुन्या घरांची डागडुजी, बांधकाम यात लक्ष घालावे. घरातील वृध्द स्त्रियांच्या आरोग्याची काळजी घ्यावी.

तूळः
तूळ राशीच्या तृतीयातील शनी करार मदार, कागदपत्रांबाबत सहकार्य करेल. तपशिलात चुका करू नका. एखाद्या अनुभवी लेखकाची मदत घ्या.

वृश्चिकः वृश्चिक मंडळींनी धनाची काळजी घ्यावी तसेच वाणीवर ताबा ठेवावा.पैशांचे प्रश्न अडकल्यासारखे होतील पण धीर धरणे आवश्यक आहे.  

धनुः
स्वस्थानाचा शनी तुम्हाला प्रगल्भ बनवण्याकरिता मदत करेल. स्वतःचे वाचन वाढवून, शहाण्या माणसांची सोबत धरून तुम्हीही त्याला मदत करणे गरजेचे आहे.

मकरः
शनी तुम्हाला बारावा येत असल्याने भ्रमनिरासाला सुरुवात होईल. वेगवेगळे अनुभव येऊन आधीच्या कल्पनेपेक्षा वस्तुस्थिती काहीशी निराळी असल्याचा प्रत्यय येईल.

कुंभः
शनी लाभात येत असल्याने स्थावर मालमत्तेसंबंधी काही लाभ होतील. वास्तूचे जुने प्रश्न सुटण्यास मदत होील.

मीन ः
राशीच्या दशमातील शनी तुम्हाला नवी कार्ये उभी करण्याकरिता मदत करेल. काम करीत रहा, मदत मिळत राहील.

सर्वांकरिता महत्त्वाची सूचनाः वर उल्लेखलेले सर्व लाभ संथ गतीने मिळणार असल्याने उतावीळ होऊ नये. तोटेही संथच गतीने होणार आहेत.

२४ जून, २०१४

पर्यावरण घरोघरी

     पर्यावरण हा आता खूप महत्त्वाचा विषय झालेला आहे, हे वाक्य आता लेखांच्या सुरुवातीला लिहिण्यात अर्थ नाही. पर्यावरणविषयक जागृतीचा काळ सुरु होऊन आता दोन दशकांहून अधिक काळ उलटला आहे. संपूर्ण जगातच या विषयाची चर्चा सुरु झालेली आहे. आपल्याकडे काही चांगले प्रयत्न होत आहेत आणि अनेकांना त्याचे गांभीर्य नाही. पर्यावरणविषयक प्रबोधनाच्या ध्यासाने झपाटले जाणारे जे काही जीव आहेत त्यापैकी एक जीव आहे दिलीप कुलकर्णी.
     श्री. कुलकर्णी हे अभियांत्रिकीचे पदविकाधारक. त्यांनी १९७८ पासून पुढे सहा वर्षे  नोकरी केली. १९८४ पासून नोकरी सोडून विवेकानंद केंद्राचे कार्य केले. १९९३ पासून पर्यावरणस्नेही जीवनशैलीसाठी कोकणातील गावात जाऊन राहिले. गतिमान संतुलन या मासिकाचे संपादक म्हणूनही त्यांची ओळख आहे. त्यांनी पर्यावरण घरोघरी हे महत्त्वाच्या विषयाची थोडक्यात ओळख करून देणारे पुस्तक लिहिले आणि ते पुस्तक अतिशय उत्तम आहे. पर्यावरणाचे रक्षण का करायचे, याची नेमक्या भाषेत माहिती करून देणारे, अजिबात फाफटपसारा नसलेले हे पुस्तक आहे. पुस्तकाचा आकार दहा सेंटिमीटर बाय तेरा सेंटिमीटर एवढाच आहे. प्राथमिक शाळेत जाणारा मुलगाही झटकन हातात घेईल आणि वाचून काढेल, अशी ही छोटेखानी उपयुक्त लेखनकृती आहे. पुस्तकाच्या कमी किंमतीने त्याच्या लोकप्रियतेत मोठाच हातभार लावला आहे.
     पुणे येथील उज्ज्वल ग्रंथ भांडारात (०२०-२४४६२२६८) याबाबत चौकशी करावी. मला या पुस्तकाच्या पहिल्या दोन पानांतच उज्ज्वल ग्रंथ भांडाराचे नाव वितरक म्हणून दिसले. या ब्लॉगवर पुस्तकाचे मुखपृष्ठ पाहता येईल.
     तेव्हा मित्रहो, हे पुस्तक जरूर वाचा, हे निराळे सांगण्याची आवश्यकता आहे का ?